A obra do alumno de Belas Artes, Diego Germade, escollida para o vestíbulo do novo hospital de Vigo
Por Redacción
O recordo daquela selva chamada Esmelle na que a memoria de Cunqueiro imaxinou ao mago Merlín. Deste xeito ideou o alumno de doutoramento da Facultade de Belas Artes do campus de Pontevedra Diego Germade a obra titulada Esmelle que desde este xoves se sitúa no vestíbulo principal do Hospital Álvaro Cunqueiro de Vigo.
A súa proposta, gañadora do I Concurso 25 anos da Facultade de Belas Artes convocado para este fin, dá a benvida desde agora aos usuarios deste centro e convídaos a parar, a contemplar a peza e a sentir a beleza da arte e do imaxinario do escritor de Mondoñedo.
Conformada por seis paneis de seis metros de longo por máis de dous de alto revestidos de pan de ouro, a peza foi a proposta gañadora do concurso realizado tralo convenio asinado entre a Facultade de Belas Artes e a sociedade concesionaria Novo Hospital de Vigo, concurso dirixido a estudantes e egresados de Belas Artes e no que se presentaron un total de 27 proxectos.