Xullo despídese con tempo inestable
Por Redacción
Os últimos días do mes de xullo estarán marcados pola inestabilidade climatolóxica.
Así establéceo a predición de MeteoGalicia para a semana que comezar con "ceos con nubes e claros con momentos moi anubrados, pouco anubrados ou despexados".
Esta situación manterase ata a fin de semana, con alta probabilidade de chuvascos durante o mércores e o xoves, días nos que as Rías Baixas se verán afectadas por un paso de frontes pouco activas que ocasionarán "un empeoramento transitorio".
Se se cumpre a predición a medio prazo, a situación cambiará coa chegada do mes de agosto, e é que a influencia anticiclónica se deixará notar a partir do sábado día 1 ocasionando á súa vez un aumento das temperaturas.
Ata entón MeteoGalicia avisa dun descenso nas temperaturas mínimas, mentres as máximas se manterán sen cambios significativos.