A rúa ferve en protestas nas horas previas ao inicio da campaña
Por Redacción
Os recortes postos en marcha polo Goberno central en materia de xustiza e sanidade, o acordo de pesca suscrito entre a Unión Europea e Mauritania e a polémica pola comercialización de participacións preferentes de Novacaixagalicia Banco. Os motivos son do máis variado, pero o resultado o mesmo. As rúas de Pontevedra viven as horas previas ao inicio da campaña electoral cun ambiente de protestas.
Os primeiros en sair á rúa foron os integrantes da plafaforma de afectados polas preferentes, que se concentraron diante da oficina de Novacaixagalicia sita na rúa Benito Corbal a primeira hora da mañá e prolongaron a súa protesta durante varias horas. A medida que se estendía no tempo a concentración o número de participantes foi menguando a un ritmo inverso que os efectivos das policías Local e Nacional que os custudiaron.
Os mariñeiros afectados polo peche do caladoiro de Mauritania irrumpiron na sede da delegación do Ministerio de Agricultura, Alimentación e Medio Ambiente de Pontevedra pasadas as once da mañá e durante catro horas pechados nas instalacións esixiron o pagamento das axudas pactadas e solucións alternativas para a flota tras o peche do caladoiro cefalopodeiro onde estaban a faenar vinte embarcacións da Península do Morrazo.
Ás 12.00 horas tocoulle o turno ás centrais sindicais compoñentes da Plataforma Sindical e de Asociacións Profesionais de Empregados Públicos na área sanitaria de Pontevedra, que intensificaron as accións reivindicativas este semana e nesta xornada se concentraron ante a porta principal do Centro de Saúde/Pac da Parda.
Á mesma hora, e como cada xoves, os afectados polos recortes en xustiza concentráronse ás portas dos Xulgados da Parda e da Audiencia Provincial de Pontevedra.