O picnic da discordia
Por Natalia Puga
Presentábase como un acto electoral máis, un dos máis amables que se convocou no que vai de campaña en Pontevedra. Tod@s por Pontevedra citou a familias con nenos nunha zona axardinada para compartir un pícnic e dar a coñecer a súa proposta de crear máis zonas de esparexemento para os cidadáns. Pero o escenario idílico que proxectara rematou en polémica, coa súa alcaldable, María Biempica, conversando con dous axentes da Policía Local e un grupo de veciños indignados.
O pícnic empezou a mediodía nunha zona verde situada entre as rúas Joaquín Costa, Travesía da Eiriña e Doce de Novembro. As familias fóronse xuntando, colocaron sobre o céspede mantas e manteis e serviron gusanitos, chucherías, augas e zumes mentres os nenos xogaban nas proximidades. A escena, moi habitual en espazos como o Hyde Park londinense ou El Retiro de Madrid, non adoita verse en Pontevedra e, a teor do que aconteceu este sábado, non gusta a unha parte da sociedade pontevedresa.
María Biempica elixiu ese punto para o seu pícnic electoral porque proxecta nesa zona da cidade un parque subterráneo cunha superficie axardinada que inclúa instalacións deportivas e espazos nos que "uno pueda sentarse en la hierba a leer un libro y que no le miren como a un loco". O mesmo modelo pretende exportalo a outras zonas da cidade de tal forma que a escena do pícnic familiar se xeneralice e se eviten, precisamente, reaccións como a deste sábado.
Poucos minutos despois de comezar o pícnic, unha patrulla da Policía Local estacionou nas inmediacións. Dous axentes apeáronse e dirixíronse aos que o secundaban. María Biempica asegura que o seu trato foi "moi amable", pero non era tan agradable a mensaxe que traían. Un veciño chamáraos queixándose de que un grupo de xente estaba a comer pipas e estragando a herba.
Un voceiro oficial da Policía Local explicou que, cando chegaron e se encontraron o pícnic, decidiron non actuar, pero si trasladaron aos presentes o que sucedera. Había queixas veciñais pola súa actitude e estaban obrigados a acudir, pero non pretendían adoptar ningún tipo de medida.
María Biempica engade esa versión que os policías lle trasladaron que, dada a controversia, se remataran o pícnic, sería máis recomendable que abandonasen o lugar. Non lles obrigaron a irse, pero si aconsellaron evitar un conflito maior prolongando a súa permanencia e trasladáronlle que estaba prohibido pisar a herba.
Pouco despois, levantaron os manteis e puxeron fin ao acto. Non crearon máis polémica, pero Biempica si quere deixar claro que "estamos molestos e indignados. Parece ser que la hierba es de decoración, que no se puede tocar". Acusa de "ridiculez" a reacción que suscitou un acto "totalmente inofensivo" e aproveita para aclarar: non comían pipas, senón gusanitos.
Relacionadas:
-
Tod@s por Pontevedra protesta contra a falta de emprego cun simulacro de emigración
Por Redacción |
-
María Biempica: "Nós apostamos por parques e eles apostan por lombos"
Por Mónica Patxot |
-
María Biempica propón que cada pontevedrés teña un espazo verde a menos de cinco minutos dá súa casa
Por Oskar Viéitez & Mónica Patxot |
-
"Hola, somos Tod@s por Pontevedra y nos presentamos a las elecciones"
Por Natalia Puga |