As Cámaras de Comercio de Pontevedra e Vilagarcía conservarán traballadores e sede tras a fusión
Por Natalia Puga
A Cámara de Comercio resultante da fusión entre as actuais institucións de Pontevedra, Vilagarcía de Arousa e Vigo terá a súa sede na cidade olívica, pero esa medida non afectará á estrutura actual do resto dos entes. Vilagarcía e Pontevedra manteranse como territorios históricos da nova Cámara e "conservan a súa sede, a súa xestión e o seu persoal".
Así o revelou este luns o presidente da Cámara de Comercio de Vilagarcía de Arousa, Miguel Falcón, durante un acto público no polígono industrial de Barro Meis. Segundo explicou, a sede viguesa aparece xa así recollida no acordo de fusión que as tres institucións asinaron a semana pasada na Xunta de Galicia.
Falcón recoñeceu que no caso da Cámara de Pontevedra o acordo de adherirse a Vigo e Vilagarcía non se aprobou en Pleno, senón só en comité executivo. Ao respecto, cabe destacar que o asunto debía aprobarse no Pleno organizado o mércores 25 de marzo, pero non houbo quórum, de modo que non puido celebrarse.
Miguel Falcón sobre a fusión: "Na Cámara de Pontevedra foi anunciado ao pleno e aprobado en comité executivo"
O presidente de Vilagarcía indicou que os regulamentos internos de cada entidade din que ten que ser aprobado en Pleno, pero "concretamente na Cámara de Pontevedra foi anunciado ao pleno e aprobado en comité executivo". A pesar de estar a recoñecer que non se deu o trámite preceptivo, Falcón quixo aclarar que "iso non ten a maior importancia", pois "existen informes xurídicos suficientes para avalar" a decisión da adhesión.
Nas súas declaracións ante os medios, fixo mención á falta de quórum que se deu no Pleno de Pontevedra nas catro últlimas sesións e sinalou que "se nunca hai quórum nun sitio, entonces nunca se aprobaría nada". En todo caso, insiste en que "existen argumentos xurídicos suficientes para validar esas actuacions".
COMUNICADO DO PERSOAL
Por outra parte, este luns referíronse á fusión os traballadores da Cámara de Pontevedra. Emitiron un comunicado no que explican que "acollen a noticia con optimismo e esperanza de futuro", ao entender que con esta integración se fomentarán, potenciarán e crearán novos servizos de acorde ás necesidades e esixencias do mercado actual, que redundarán en beneficios para o empresariado das tres Cámaras.
O persoal amosa o seu "apoio e agradecemento" aos órganos de xestión da entidade, que "deron un paso á fronte para evitar a súa desaparición".
Relacionadas:
-
A Xunta presentará en setembro a nova Cámara resultante da fusión das de Pontevedra, Vigo e Vilagarcía
Por Redacción |
-
Un empresario denuncia ante a Xunta o proceso de fusión da Cámara de Comercio con Vigo e Vilagarcía
Por Redacción |
-
A maioría do pleno da Cámara refrenda a fusión das institucións camerais de Pontevedra, Vigo e Vilagarcía
Por Cristina Saiz & Anxo Lourido |
-
A Xunta require a Cámara de Comercio que convoque ao Pleno de xeito extraordinario para aprobar a fusión
Por Oskar Viéitez |
-
A Xunta 'bendice' a fusión das Cámaras de Comercio de Pontevedra, Vigo e Vilagarcía
Por Redacción |
-
Unanimidade política en Pontevedra: a fusión das Cámaras de Comercio é por "supervivencia"
Por Alejandro Espiño |
-
Acordo para a fusión das Cámaras de Comercio de Pontevedra, Vigo e Vilagarcía
Por Redacción |