Máis preto da nova fase do ARI de Estribela, pero sen noticias do centro histórico
Por Redacción
Un novo trámite deixa cada vez máis preto de poder executarse a nova fase da Área de Rehabilitación Integral (ARI) de Estribela, relativa aos anos 2015 e 2016, e na que se rehabilitarán 32 vivendas e realizarán obras de urbanización na rúa de Comboa.
O Concello de Pontevedra ratificou este venres o convenio de financiamento, que o propio Goberno local define como unha formalidade administrativa para traspasar os fondos do anterior Plan Estatal de Vivenda ao actual.
O concelleiro de Urbanismo, Antón Louro, recorda que o investimento total previsto no barrio é de 525.119,11 euros, dos que o 33,8% se corresponden coa achega municipal, isto é, 177.981 euros. O Ministerio de Fomento aporta 164.547 euros (o 31,3% do orzamento); a Xunta, 122.199 euros (o 23,2%); e os veciños beficiarios o 11,5% restante, porcentaxe que se materializa en 60.391,12 euros. O principal esforzo realizarase durante este ano 2015, cun investimento total de 325.119 euros, mentres que os 200.000 restantes agardarán polo 2016.
Louro aproveitou este novo trámite para lamentar que o ARI do centro histórico siga agardando e explica que o Plan Estatal de Vivenda 2013-2016, a pesares de que xa entrou en vigor hai dous anos, limítase á integración dos fondos do anterior plan, como é o caso dos aprobados para Estribela.
Ao repecto, indicou que os concellos seguen agardando que a Xunta de Galicia publique a orde reguladora na que se deben fixar os obxectivos e repartirse os fondos asignados. Unha vez publicada esa orde autonómica, o Concello aprobará a ordenanza reguladora das subvencións no centro histórico e poderá poñer en marcha definitivamente o ARI.
Relacionadas:
-
O Concello propón rehabilitar 67 vivendas e investir 658.000 euros na nova fase do ARI de Estribela
Por Redacción |
-
O 31 de xullo remata o prazo para solicitar axudas para a rehabilitación de fachadas
Por Redacción |
-
Os veciños de Estribela ingresan máis de 110.000 euros polas subvencións da Área de Rehabilitación Integral
Por Redacción |
-
Louro destaca o éxito do ARI de Estribela e as boas expectativas para o do Centro Histórico
Por Alejandro Espiño |
-
O Centro Histórico de Pontevedra, declarado Área de Rehabilitación Integral
Por Redacción |