Trasladan a Montecelo un home que apareceu atropelado e tirado na estrada en Sanxenxo
Por Redacción
Un home foi trasladado en ambulancia este mércores ao Hospital Montecelo de Pontevedra logo de ser vítima dun atropelo no lugar da Revolta, en Sanxenxo.
Segundo informou o Centro de Atención de Emerxencias de Galicia 112, o home foi localizado tendido na vía por varios veciños ás 16.20 horas. Despois de recibir os primeiros auxilios, foi trasladado ao Hospital de Montecelo.
Ademais do persoal sanitario de Urxencias Médicas, dende o Centro de Atención ás Emerxencias de Galicia solicitouse a intervención da Garda Civil de Tráfico e dos efectivos do Grupo Municipal de Emerxencias de Sanxenxo.