Pepe Solla despide un ano excepcional cun 'showcooking' de Nadal no seu restaurante
Antes de que Casa Solla peche as súas portas -tranquilos, só durante o Nadal-, Pepe Solla quixo despedir o ano cun 'showcooking' moi especial. Nel, presentou as súas propostas para deseñar un perfecto menú co que triunfar en calquera das comidas e ceas que se nos acumulan nesta época do Nadal. E sen necesidade de ter, como el, tres Soles Repsol ou unha Estrela Michelín. Son pratos que están ao alcance de calquera amante da cociña.
O primeiro, segundo Pepe Solla, é elixir ben o que se vai servir. E neste caso non ten dúbida. O marisco non pode faltar. El aposta polas ostras e os berberechos porque "no cambian mucho de precio" nesta época e porque, no caso das primeiras, é un dos produtos "que más evocan el lujo, pero tienen un precio super económico". Ademais, prepáranse en moi pouco tempo e o seu sabor é "insuperable".
Para os berberechos, o chef prefire cociñalos unicamente cun par de minutos ao vapor "sin que toquen siquiera el agua" e posteriormente relar por enriba a pel dunha lima. E as ostras cruas, por suposto. Pero para realzar o seu sabor suxire aderezalas con ceviche, un millo salteado nun pouco de aceite, un chisco de caldo de peixe, limón e chile dodificados cun sifón e un pouco de coandro por enriba.
Un fresco e saboroso tartar de carne de vaca foi a seguinte proposta. "De vaca gallega, porque tenemos que reivindicar el producto autóctono", matizou. A carne, que tamén se serve crua, debe ser picada de forma moi fina. Vai acompañada de aceite de sésamo e de oliva, sal, vinagre de Módena, salsa de soia, xema de ovo, unha mostaza moi suave e unha mestura de alcaparras, cogombros e ceboliñas. Todo iso servido sobre pan de sésamo.
Como mandan os canons do Nadal, o prato principal deste 'showcooking' foi o bacallau. Pepe Solla explicou que habitualmente "somos muy agresivos cocinándolo y tenemos que ser muy suavecitos". Por iso, el propón temperar o aceite e cando alcance unha temperatura "no demasiada elevada" colocar o bacallau durante "ocho o diez minutos", retirándoo mesmo do lume para que non se cociñe en exceso.
O seu bacallau preséntase con coliflor, pero en forma de puré e mesturado con "un 30% de su peso en mantequilla". Ademais, acompáñase con brócoli e coles de Bruxelas, verduras que ademais compoñen unha crema moi lixeira á que se lle engade, entre outros, caldo de peixe e un toque de menta. Un caldo de repolo e xamón, servida a través dunha xiringa para encher as verduras, completa este prato.
E que pasa coa sobremesa? O clásico, os turróns nas súas múltiples formas. "Es algo que solo comemos en estas fechas, así que por qué vamos a renunciar a ellos", destaca o cociñeiro pontevedrés. Aínda que tamén se pode innovar con eles e presentalos como crema, en forma de xeado e bombóns ou, probablemente a máis exquisita de todas, como recheo dun suculento e doce 'coulant'.
E como toda cea de Nadal, esta cita con Pepe Solla non podía finalizar sen verbalizar os tradicionais propósitos de Aninovo. E que lle pide para 2015? Moitos preguntáronlle: unha segunda Estrela Michelín? "Esas no se piden, se ganan con mucho trabajo", asegura. Cre que este ano estivo preto, por iso adianta que "trabajaremos con fuerza para conseguirlo". Iso si, hai algo que ten claro. "No puedes obsesionarte con ello", afirma.
Agora, tras un ano intenso onde tamén debutou sobre os escenarios ao lado de Xoel López, ten por diante un merecido descanso. Casa Solla pecha ata o 5 de xaneiro, uns días que aproveitará para estar coa familia. "En eso soy muy tradicional, me gusta pasar las Navidades con los míos", recoñece. E será a súa nai a que se poña nos fogóns porque esta época "tiene que saber a tradición, a casa".
A pesar desta pequena paréntese, este Nadal veremos a Pepe Solla na cociña. Salvo que non será no seu restaurante, senón na televisión. O pontevedrés é un dos chefs que participarán como convidados na segunda edición de MasterChef Junior, a versión infantil do popular concurso de TVE. "Fue una experiencia fantástica y el programa ha quedado muy bonito. Ya lo veréis".
Relacionadas:
-
Pepe Solla, primeiro cociñeiro galego en lograr tres Soles Repsol
Por Alejandro Espiño |
-
Pepe Solla, Yayo Daporta, Javier Olleros e Pepe Vieira revalidan, un ano máis, as súas estrelas Michelín
Por Alejandro Espiño |
-
"A cociña galega vive un momento fantástico. Nunca houbo tanta xente facendo cousas tan interesantes"
Por Alejandro Espiño & Mónica Patxot |