O PP aproba en solitario o orzamento da Deputación
Por Oskar Viéitez
O orzamento da Deputación de Pontevedra para 2013 xa está aprobado.
Serán un total de 148,5 millóns de euros para o próximo exercicio.
Non houbo sorpresas en pleno extraordinario celebrado este mércores e BNG e PSOE votaron en contra do orzamento que saíu aprobado coa maioría dos votos que sosteñen os deputados do Partido Popular.
Durante o debate plenario o responsable económico da institución provincial, José Manuel Figueroa, destacou que as contas provinciales son "liquides e equilibradas".
"Satisfeito", por estar convencido de que "a Deputación está facendo ben as cousas" o vicepresidente provincial apuntou que o novo orzamento xerará en 2013 "débeda cero", e ademais destinará 14,9 millóns de euros para amortizar a débeda da institución, cifrada en 92,7 millóns.
Foron argumentos que non convenceron aos deputados da oposición que rexeitaron as contas non só por "continuistas" senón porque "van na dirección equivocada", sinalou o portavoz do Grupo provincial do BNG, Cesáreo Mosquera.
Para os nacionalistas o orzamento pretende "adelgazar a administración cunha clara intencionalidade política".
Pola súa banda o Grupo provincial do PSdeG-PSOE presentou varias enmendas ao orzamento. A primeira pedía que se incrementasen os fondos destinados ao Plan de emprego en 833.000 euros. O diñeiro sacaríase da partida destinada a "protocolo e agasallos".
Non foi o único movemento contable que propuxeron os socialistas, noutra enmenda solicitaron que o diñeiro adxudicado para os campos de herba sintética sexa para o servizo de teleasistencia.
O pleno estivo salpicado de emotivas referencias ao deputado provincial e alcalde de Meaño, Jorge Domínguez, recientemente falecido. Na próxima sesión asumirá a súa acta de deputado, o alcalde de Meis, José Luís Pérez.