A Igrexa prepara en Pontevedra os seus axentes 007 con "licenza para evanxelizar"
Por Oskar Viéitez
O arcebispado de Santiago pon en marcha en Pontevedra a segunda edición do Máster da Nova Evanxelización.
Segundo explican entre os obxectivos está formar novos evanxelizadores "con novo ardor e novos métodos".
Prográmanse catro talleres:
- Aprender a amar na Era Dixital, a cargo de Montse González e Javier Rodríguez. O propósito é "educar o amor humano", do namoramento ao "si quero", co que mostrarán "un amor sen data de caducidade".
- Catequistas para a Nova Evanxelización, a cargo de Javier García e Miguel Varela, os que ofrecerán ferramentas e dinámicas aplicables á Catequese. "Ensinaremos o Evanxeo con alegría", aseguran.
- Acompañamento no duelo, é o tema escollido por Benito Rodríguez e Nuria Vázquez, que darán pautas para saber Como acompañar "en situacións difíciles da vida"
- Guerrilla God Art, é o último dos temas elixidos, a cargo de Alfonso Fernández e Fernando Tomé que informarán sobre as "novas formas de expresión e comunicación ao servizo de Su Santidad". Ou como eles mesmos se definen serán uns Axentes 007 con "licenza para evanxelizar"
O Máster da Nova Evanxelización impartirase os sábados 11 outubro, 8 novembro, 13 decembro, 10 xaneiro, 7 febreiro, 14 marzo, 11 abril e 9 maio, de 10:00 a 14:00 horas e con posibilidade de quedar a comer.
As prazas son limitadas e o prazo de inscrición remata o 6 de outubro. O prezo é de 20 euros.