Mediaset, editora de Telecinco ou Cuatro, forma futuros profesionais da televisión no campus de Pontevedra
Por Redacción
Mediaset España, compañía editora de canais de televisión como Telecinco e Cuatro, desembarcou no campus de Pontevedra. Máis de 200 estudantes da Facultade de Ciencias Sociais e da Comunicación participan desde este venres nun curso de formación que responsables desta compañía impartirán ata o próximo 7 de novembro. Trátase dunha actividade que espertou unha grande expectación.
Con este curso, os alumnos poderán coñecer todas as fases de traballo que hai detrás dunha produción audiovisual, "acercando al alumnado a esta realidad", segundo destacou o director de contidos de Mediaset, Manuel Villanueva, na súa presentación. El mesmo foi o encargado de abrir esta iniciativa cun relatorio titulado O mercado da televisión, que impartiu pola tarde no salón de actos da facultade pontevedresa.
Concretamente, segundo explicou Villanueva, o obxectivo destas leccións será amosar "de una manera muy sencilla" todo o proceso de creación dun proxecto audiovisual, desde a idea inicial á súa comercialización final. De aí que na nómina de conferenciantes figuren os máximos responsables de programación, produción, ficción ou adquisición de dereitos do grupo. Entre eles estará o propio conselleiro delegado, Paolo Vasile.
Trala sesión inaugural deste venres, o curso continuará o 26 de setembro coa participación de Miguel Vila, director de proxectos de Mediaset, que impartirá un relatorio titulado O proceso de creación. Como se detecta e se ensambla un formato. Sete días despois, chegará a Pontevedra o produtor Ghislain Barrois, para falar do investimento en cine, mentres que o 10 de outubro tomaralle o relato o director de produción do grupo, Leonardo Baltanás.
Ou ben Toni Sevilla ou ben Pepa Sánchez, directores de ficción e miniseries respectivamente, serán os seguintes en pasar por Pontevedra o 17 de outubro, unha semana antes de que a directora de Antena, Patricia Marco, imparta ao relatorio A programación. A experiencia multicanle. Xa o 31 de outubro chegará a quenda de Ana Bueno, directora de novas tecnoloxías do grupo, que ofrecerá o último relatorio antes de que Paolo Vasile acuda á cidade para clausurar este curso nun acto que, probablemente será aberto ao público.
CONVENIO CON MEDIASET
Froito dun convenio asinado no ano 2013 polo grupo audiovisual e o Consello Social, este curso supón un "hito" para a institución académica, como salientou o vicerreitor do campus de Pontevedra, José Corbacho, que incidiu na importancia de que "ocho directivos del grupo vengan a Pontevedra a compartir con alumnos y profesores su experiencia y sus conocimientos". Todos eles veñen de forma totalmente desinteresada.
Este acordo abriu tamén a posibilidade de que o alumnado da facultade puidese realizar prácticas extracurriculares nas instalacións centrais de Mediaset en Madrid. Algo que un grupo de estudantes vén de levar a cabo con excelentes resultados. "No pudieron darme mejores referencias, su rendimiento fue estupendo", salientou Manuel Villanueva, que anunciou que a "comunicación moi fluída" con esta facultade poderá verse traducida en novas iniciativas.
Relacionadas:
-
Alumnos de Ciencias Sociais traballan para volver gañar o "Proyecto Mañana" de Atresmedia
Por Redacción |
-
Atresmedia premia as propostas do alumnado de Ciencias Sociais e da Comunicación
Por Redacción |
-
Paolo Vasile: "Internet no ha matado la TV. Ha alargado su vida. Le ha dado muchas más posibilidades"
Por Alejandro Espiño & Mónica Patxot |
-
De Bueu á casa de 'Gran Hermano': Hugo Pérez e a súa cabra, entran no popular concurso de Telecinco
Por Redacción |
-
Paolo Vasile, en Pontevedra: "¿Telebasura? A los que hablan mal de nosotros les encantaría hacer esta televisión"
Por Alejandro Espiño & Mónica Patxot |
-
De Pontevedra a "Sálvame" ou "Gran Hermano": Paolo Vasile buscará novos talentos no campus
Por Redacción |