As obras no barrio de San Antoniño ampliaranse a Gonzalo Gallas e Javier Puig
Por Alejandro Espiño
O barrio de San Antoniño é unha "prioridade" para a concellaría de Urbanismo. Así o afirmou este venres Antón Louro durante unha visita as obras de reforma urbana que comezaron nas rúas Víctor Cervera Mercadillo e Gerardo Álvarez Limeses. De aí que o Concello de Pontevedra teña pensado ampliar as intervencións neste ámbito. Nas próximas semanas aprobaranse novos traballos, entre outras, nas rúas Gonzalo Gallas e Javier Puig.
"Xa ninguén poderá dicir que San Antoniño está abandonado", subliñou Louro. Avanzou que estes novos traballos poderán financiarse aproveitando os fondos da última modificación de crédito. Actualmente estase analizando o custo destas actuacións para tomar unha decisión definitiva sobre as rúas nas que se actuará, xa que o edil socialista adiantou que tamén lle gustaría poder reformar Casimiro Gómez e Amado Carballo.
Antón Louro comprobou, acompañado de técnicos municipais e das empresas contratistas, o avance dos traballos en Cervera Mercadillo e Álvarez Limeses e anunciou que, agás que as condicións meteorolóxicas sexan especialmente adversas, rematarán durante o próximo mes de decembro.
As obras da rúa de Víctor Cervera Mercadillo están a cargo de Oresa cun orzamento final de 131.258,64 euros. No caso de Gerardo Álvarez Limeses, a seleccionada é Covsa e o orzamento sobe ata os 221.846,85 euros. Nos próximos días, anunciou Louro, comezará tamén a segunda fase da rúa de Blanco Porto, que xa está tamén adxudicada.
Os principios que inspiran estas obras son os da ampliación das beirarrúas e mantemento da circulación rodada nas mesmas condicións que ata o de agora. Ao tempo, mantense a capacidade de estacionamento, especialmente na rúa de Álvarez Limeses, onde a maior anchura permite crear dúas bolsas con capacidade para 24 vehículos. Nestas dúas vías urbanas hai beirarrúas inferiores a 80 centímetros e contan cunha superficie absolutamente irregular.
Ao mesmo tempo, outra das deficiencias máis significadas na zona é a obsolescencia das redes de auga, pluviais e saneamento, polo que deberán ser completamente renovadas. No que atinxe á iluminación, aproveitaranse as luminarias led recentemente instaladas.
Relacionadas:
-
Á rehabilitación integral da rúa Javier Puig sáenlle 32 pretendentes, 14 de Pontevedra
Por Redacción |
-
Antes do mes de maio comezará a segunda fase das obras de San Antoniño
Por Redacción |
-
A reforma do barrio de San Antoniño estenderase en 2015 ata a rúa Lepanto
Por Diego Espiño |
-
As obras de Blanco Porto van "como un tiro" e estarán rematadas a principios de novembro
Por Redacción |
-
Cortan ao tráfico as rúas Álvarez Limeses e Víctor Cervera Mercadillo para iniciar a súa rehabilitación
Por Redacción |
-
Veciños de Barcelos e San Antoniño coñecen as propostas de +Boavila para o seu barrio
Por Redacción |
-
A reforma integral de Víctor Cervera Mercadillo e Gerardo Álvarez Limeses estará acabada antes de fin de ano
Por Redacción |