A praia de Silgar perde as súas pasareas con motivo das altas mareas
Por Redacción
As altas mareas dos últimos días, provocadas pola maior proximidade da Lúa á Terra, provocaron que o mar cubrise case por completo moitas das praias de Sanxenxo. A auga chegou ata o mobiliario colocado en diversos areais e mesmo aos muros, facendo desaparecer algúns destes areais case por completo.
A auga chegou así ata as pasareas colocadas a principio do verán nos areais de Major e de Pragueira, sen ocasionar danos como os que si se produciron na praia de Silgar, onde o mar tragou as pasareas que desapareceron case na súa totalidade.
Ademais, dende o departamento de servizos comezaran a retirar algas que o mar depositara en diversas praias e, con motivo das mareas grandes que se están a producir estes días, os areais volven mostrarse cubertos de tal cantidade de algas que o persoal se viu obrigado a abandonar este labor, xa que é imposible levalo a cabo.
Dende a concellaría de Medio Ambiente valorarán a posibilidade de repoñer este mobiliario, decisión que dependerá da previsión do tempo coa que se conte para os próximos días xa que a tempada de praia se encontra a punto de finalizar e con tal motivo, as pasarenas retiraríanse de igual modo, como todos os anos, para evitar a perda deste mobiliario nos temporais de inverno.