Denunciada por aparcar en prazas para persoas con discapacidade usando a tarxeta da súa nai morta
Por Natalia Puga
Unha sesaxenaria foi denunciada pola Policía Local de Pontevedra por uso indebido dunha tarxeta para estacionamento en prazas reservadas para persoas con discapacidade. Foi detectada en tres ocasións estacionando o seu vehículo na mesma praza usando unha tarxeta a nome da súa nai, que está morta.
Esta conducta infractora detectouse por primeira vez o día 16 de agosto. Eran as 10.35 horas e unha patrulla da Policía Local observou como unha muller sen problemas aparentes de mobilidade estacionaba no espazo reservado para persoas con mobilidade reducida da praza de Valentín García Escudero e marchaba soa do lugar. Non trasportaba a ningunha persoa que necesitase usar unha destas prazas.
Dez días despois, o 26 de agosto, unha patrulla volveu observar a mesma conducta. Era un pouco máis cedo, sobre as 9.55 horas, cando a muller chegou, estacionou no mesmo espazo, colocou unha tarxeta e baixou do vehículo sen compañía.
Uns 40 minutos máis tarde, sobre as 10:34 horas, regresou soa e marchou co vehículo. Nese momento, unha patrulla policial seguiuna para intentar averiguar se recollía a algunha persoa, pero os axentes comprobaron que non. A condutora saiu da cidade en dirección á avenida de Compostela, a rúa Médico Ballina e a estrada de Santiago.
Nos últimos catro meses, a Policía Local denunciou cinco persoas por uso indebido destas tarxetas
Ao día seguinte, tras ter confirmado estas dúas actuacións previas, a Policía Local intensificou o control sobre o vehículo. A primeira hora de mañá, ás 8.35 horas, estacionou na praza de Valentin García Escudero novamente estando soa, coma nas outras ocasións. Nese momento, os axentes identificaron á condutora e notificáronlle tres denuncias (a desa mañá e a dos días 16 e 26).
Ademais, pedíronlle a tarxeta que colocaba no vehículo cando aparcaba na praza reservada para persoas con discapacidade e comprobaron que estaba a nome da nai da infractora, xa falecida. A muller recoñeceu o uso indebido da tarxeta.
A muller resultou ser veciña de Meis e os axentes comprobaron que acudía con frecuencia a Pontevedra e adoitaba estacionar no reservado para persoas con mobilidade reducida na praza de Valentín García Escudero.
Esta conduta non é unha excepción. Nos últimos catro meses, a Policía Local denunciou cinco persoas por uso indebido destas tarxetas.
Relacionadas:
-
Denunciado por aparcar nunha praza reservada para discapacitados usando a copia dun cartón que atopou nun coche
Por Natalia Puga |
-
Pillada unha veciña que usaba fraudulentamente unha tarxeta de discapacitado para aparcar
Por Redacción |
-
Denuncian un home que utilizaba a tarxeta da súa muller falecida para aparcar en prazas para discapacitados
Por Redacción |
-
Multan unha parella pontevedresa por aparcar utilizando dúas tarxetas de discapacitados falsificadas
Por Oskar Viéitez |
-
315 euros de sanción por aparcar reiteradamente nunha praza para discapacitados para ir a traballar
Por Diego Espiño |