Deteñen un veciño de Pontevedra nunha rede internacional que cobraba débedas de empresarios mediante violencia
Por Natalia Puga
A Garda Civil detivo un veciño de Pontevedra de 43 anos como suposto integrante dunha organización internacional dedicada ao cobramento de débedas a empresarios de toda España, Portugal e diversas partes de Europa que utilizaban gran violencia, coaccións e ameazas contra os debedores.
A operación, denominada Explosiva Juan, desenvolveuse nas provincias de Pontevedra, Badajoz, Madrid, Guadalajara e Cantabria e nos últimos días realizáronse sete detencións.
Segundo confirmaron fontes da Garda Civil de Navarra, tres dos arrestados son veciños de concellos pontevedreses, en concreto, de Baiona (D.S.C., de 34 anos), Porriño (P.M.G., de 40 anos) e a capital (M.D.L.). Os tres son de nacionalidade cubana e entre eles está o suposto líder da rede e o seu lugartenente.
A operación operaba a través da empresa Eurobulldog, que actuaba dende unha vivenda situada en Porriño na que foi detido o suposto líder, que era o que premía os debedores en compañía dun dos seus lugartenentes utilizando ameazas e violencia física. Tanto el coma o lugartenente ingresaron en prisión sen fianza por orde xudicial, mentres que os outros cinco detidos quedaron en liberdade con cargos.
A investigación iniciouse en agosto do pasado ano a raíz de varias denuncias presentadas ante a Garda Civil nas que as vítimas manifestaban estar a sufrir ameazas e extorsións por parte de determinadas persoas pertencentes a unha empresa dedicada ao cobramento de débedas contraídas polas vítimas con outras persoas ou empresas.
A organización ofrecía os servizos da súa empresa aos clientes a través dunha web que segue activa e dende onde os empresarios contactaban co líder da rede. Unha vez establecidos os contactos entre ambas as dúas partes o empresario proporcionaba os datos e información da vítima, así como a contía económica á que ascendía a débeda contraída.
Unha vez que a organización localizaba aos supostos morosos realizaban visitas intimidatorias, ameazantes e insultantes aos domicilios de victimas as ou aos familiares máis próximos e vulnerables. A continuación, nas sucesivas visitas ían subindo o grao de violencia poñendo de manifesto que unha das súas visitas finalizou cunha tentativa de homicidio dun dos supostos debedores.
A operación foi dirixida polo Xulgado de Primera Instancia e Instrución número 2 de Tudela (Navarra) e o Xulgado de Instrución número 2 de Guadalajara. Levárona a cabo as Unidades Orgánicas de Policía Xudicial da Garda Civil de Navarra e Guadalajara e participaron axentes de diversas especialidades.