Detectan seis vehículos realizando tarefas de transporte escolar sen autorización
Por Natalia Puga
Seis vehículos foron detectados pola Policía Local de Pontevedra ao longo do ano 2013 mentres realizaban servizos de transporte escolar a pesar de que carecían de autoriación para esta actividade.
A memoria anual da Policía Local relativa ao ano 2013 recolle as inspeccións realizadas para garantir o cumprimento da normativa no transporte escolar, que derivaron nun total de 21 denuncias por outras tantas infraccións. Entre as infraccións detectadas a máis frecuente foi a de carecer de autorización para o transporte escolar, que supón o 29% do total.
A segunda infracción máis frecuente detectouse en cinco vehículos, o 24% dos sancionados, que carecían de dispositivos luminosos de sinal de emerxencia. Ademais, foron denunciados dous vehículos por non levar os martelos rompe cristais obrigatorios e outros dous por non pasar a ITV.
Ademais, houbo dous vehículos que cometeron a infracción de non levar sinal indicativo de que se dedican ao transporte escolar e outros dous aos que os axentes da Policía Local denunciaron porque os seus condutores non lles presentaron o contrato de colaboración entre transportistas.
As 21 infraccións detectadas complétanse cun vehículo que tiña o extintor caducado e outro que non tiña sinalizados os bordos dos chanzos con cores vivas como establece a normativa.