O BNG denuncia que a Xunta "prepara o desembarco de Ence no Pazo de Lourizán"
Por Oskar Viéitez
O deputado do BNG, Luís Bará, denuncia a situación de desmantelamento do Centro de Investigacións Forestais (CIF) e anticipa que "o Executivo de Alfonso Rueda prepara o desembarco de Ence no Pazo de Lourizán".
O parlamentario pontevedrés alerta de que o recente traspaso da xestión do CIF de Lourizán a Industria "é un paso máis cara a súa desaparición".
O deputado o Bloque levará este tema este mércores á Comisión correspondente do Parlemento galego, para advertir que o Goberno do PP "pretende desvirtuar o CIF e substituílo por un Centro de Investigación da Industria Forestal tutelado por Ence". Segundo asegura, na mesma operación está incluída "a cesión do Pazo de Lourizán a un conglomerado empresarial dirixido pola empresa pasteira".
O deputado nacionalista sinala que "o Centro de Investigacións Forestais de Lourizán está baixo mínimos, con varias prazas sen cubrir, outras cubertas mediante convenios con entidades privadas, sen continuidade dos proxectos de investigación, con instalacións sen uso, e coa fuga constante de persoal de investigación que se ve obrigado a buscar o seu futuro profesional noutros centros pola falta de alicientes e expectativas".
"A Xunta do PP está sometendo o CIF de Lourizán a unha morte lenta", asegura, para engadir que o que foi centro de referencia da investigación forestal no Estado "esmorece por falta de medios e de apoio institucional", o que provoca que "liñas de investigación que antano foron punteiras están agora baixo mínimos".
En opinión do deputado, "semella que o único interese do Executivo de Rueda é poñer o Centro de Investigacións e o Pazo de Lourizán nas mans de grandes empresas do sector forestal, unha operación -sentencia- capitaneada por Ence e dirixida persoalmente polo presidente da Xunta, que xa intentou no seu día a cesión do pazo á empresa pasteira e agora pretende facelo pola porta de atrás, con nocturnidade e aleivosía".
Relacionadas:
-
ENCE abre en setembro o prazo para solicitar as axudas do seu plan social
Por Anxo Lourido |
-
O rexeitamento á pasteira de Altri comparte protagonismo na marcha contra ENCE
Por Oskar Viéitez |
-
Ecoloxistas en Acción pon unha "bandeira negra" á Xunta "por promover industria contaminante, Altri e Ence"
Por Oskar Viéitez |