O porto de Marín separa en orixe o 70% dos residuos
Por Redacción
Os diferentes sistemas implantados pola Autoridade Portuaria para a recollida selectiva e reutilización de residuos, deron como resultado no balance global de 2013 que ata un 70% dos materiais de refugallo xerados polas actividades portuarias se separasen en orixe. Isto supón case 600 toneladas de residuos, en comparación coas 440 que se recolleron de xeito selectivo en 2012.
O maior volume de residuos separado en orixe corresponde ás redes e burlóns, con 267 toneladas. O resto de material de refugallo sometido a recollida selectiva está composto por madeira, papel, plásticos, vidro, poliexpan, envases lixeiros ou pilas.
A Autoridade Portuaria leva anos implantado diversos programas de xestión ambiental sostible, como o da recollida selectiva e posta en valor para a súa reutilización de diversos residuos. Ademais, os barcos pesqueiros que participan no proxecto PESCAL (Pesca Sostible en Caladoiros Limpos) seguen coa retirada do mar e depósito nos puntos autorizados de lixo como plásticos, latas, restos de redes, pneumáticos, restos de roupa, madeira, etc. Durante 2013 retiráronse do mar case 5.000 quilos de refugallos.