Duelo de altura entre Teucro e Alcobendas no Municipal
Por Diego Espiño
O terceiro clasificado da División de Honra Prata, o Balonmano Alcobendas, visita Pontevedra no partido máis esixente ata o momento para a Sociedad Deportiva Teucro (Sábado, 20:00 horas).
Os azuis tratarán de chegar ao parón ligueiro, pola disputa da primeira eliminatoria da Copa do Rei, no posto de ascenso directo que ocupan na actualidade tras sumar sete dos oito puntos posibles no inicio de liga.
Ao Municipal chega un conxunto, o madrileño, que disputou a pasada campaña a fase de ascenso a Asobal, ao igual que o Teucro, e que parte co obxectivo de repetir na loita por subir de categoría.
Mentres Javier Barrios terá a todos os seus xogadores dispoñibles, o que o obrigará a realizar un descarte, o Alcobendas contará con varias dúbidas, aínda que todas elas entraron na convocatoria de Daniel Sánchez-Nieves.
O técnico do equipo madrileño esperará ao quecemento previo ao choque para comprobar o estado de César Beret, ausente nos últimos adestramentos, e de Mikel Muñoz, Alfonso De la Rubia e Adrián Prieto, con diversas molestias.
O partido será arbitrado por Amigo Plaza e Espadas García de la Galana, do colexio castelán-manchego.