ÿxito da festa do CW Galaico na piscina de Campolongo
Por Redacción & Diego Torrado
A Festa do Waterpolo que promoveu este sábado o CW Galaico Pontevedra foi todo un éxito. Ducias de nenos, de entre 7 e 12 anos, participaron nas numerosas actividades organizadas para promover a práctica deste deporte entre os mozos pontevedreses.
Desde as 17.30 horas, momento no que comezou esta festa, a piscina de Campolongo encheuse de nenos e nenas ansiosos de dar os seus primeiros pasos no mundo do waterpolo. O único requisito para poder participar era que todos eles tiñan que saber nadar un mínimo de 50 metros sen axuda de ningún tipo de material.
O obxectivo deste evento era que o Club Waterpolo Galaico puidese captar nenos e nenas para as súas escolas, aínda que os participantes nesta festa non adquirían ningún compromiso de permanencia no club.
Todos eles probaron o waterpolo xogando varios partidos de mini-waterpolo, formando equipos co seu grupo de amigos. A aqueles que se inscribiron de forma individual, o CW Galaico buscoulles compañeiros. Instaláronse tres campos nas piscinas grande e mediana, de forma que se puideron disputar tres partidos simultáneos cada dez minutos.
Os xogadores do club colaboraron con esta festa facendo funcións de árbitros e adestradores, ensinando aos máis pequenos a xogar a este deporte.