A Ponferradina, un rival en cadro e ferido para recibir ao Pontevedra
Por Diego Espiño
Era un dos equipos sinalados por todos como favorito ao ascenso de categoría ao comezo de tempada, pero a competición situoulle noutro lugar co paso das xornadas.
A Ponferradina, próximo rival do Pontevedra en liga (domingo, 18:00 horas no Toralín), marcha na sexta posición a 10 puntos dos granates, polo que preparan o encontro como a súa última oportunidade para engancharse á loita polo play-off, xa que un triunfo do Pontevedra supoñería un novo golpe de efecto e deixaría aos de Luisito moi preto de certificar o cuarto posto.
Será un duelo o de Ponferrada de estados de ánimo. Uns, os granates, reforzados pola épica remontada ante o Tudelano, mentres os outros chegarán á cita en crise, feridos e aínda por riba con importantes baixas.
O cadro berciano enfrontarase aos pontevedreses coas ausencias do defensor Gonzalo, expulsado ante o Celta B, e os centrocampistas Jonathan e Chavero por cumprir ciclo de amoestacións, mentres o tamén centrocampista Cidoncha continúa lesionado.
Problemas para o seu novo técnico, Miguel Ángel Álvarez Tomé, que non tivo unha boa estrea á fronte do equipo tras a saída de Munitis ao caer goleado no municipal vigués de Barreiro. A Ponferradina non chega de feito ao choque nun bo momento, xa que acumula tres derrotas consecutivas e só un triunfo nas sete últimas xornadas.
Pese á potencial liña por liña do seu plantel, con futbolistas en ataque como o ex-granate Yuri de Souza, a 'Ponfe' evidenciou durante a liga falta de gol, con só 25 anotados nas 31 xornadas disputadas ata o momento nunhas cifras que só empeoran no Grupo I da Segunda B o pechacancelas Somozas, o Palencia (18º) e o Tudelano (11º).
Con todo no Pontevedra non se fían dos números, polo que viaxarán sobre aviso á localidade leonesa sabedores do que supoñería vencer no Toralín e conscientes da calidade do equipo rival.
Relacionadas:
-
Mateu falla un penalti e o Pontevedra deixa escapar a ocasión de descartar á Ponferradina (1-0)
Por Redacción |
-
"A morte" a Ponferrada e con todo o plantel
Por Diego Espiño |
-
Ante a Cutural Leonesa, en sábado
Por Redacción |
-
Mario Barco, listo para volver ao equipo en Ponferrada
Por Diego Espiño |
-
Viaxe de balde para acompañar o Pontevedra no Toralín
Por Redacción |
-
A fe e a ambición dá a remontada ao Pontevedra sobre o Tudelano, con gol de Bruno no desconto (2-1)
Por Ramiro Espiño & Diego Torrado |