Competición desestima os recursos por Miguel e Bonilla, que serán baixa ante o Tudelano
Por Diego Espiño
O Xuíz Único de Competición da Segunda División B confirmou este mércores as sancións a Miguel Loureiro e Bonilla, que desta forma causarán baixa no encontro do próximo domingo (17:00 horas) ante o Tudelano no Estadio Municipal de Pasarón.
Estas ausencias provocan un problema importante para Luisito, que deberá recompoñer a liña defensiva do equipo ao non poder contar cos seus dous laterais titulares habituais e deixando só un especialista dispoñible nesta posición, Adrián Gómez.
O Pontevedra presentou recurso en ambos os casos, pero o Xuíz Único desestimou os argumentos do club granate, que achegara probas videográficas.
Para o responsable de Competición non foi suficiente o argumento do Pontevedra xa que "non é posible revogar unha decisión arbitral invocando unha discrepancia na interpretación das Regras do xogo, cuxa competencia única, exclusiva e definitiva corresponde ao colexiado", sinala no seu fallo o Xuíz, engadindo que "das imaxes despréndese que as accións do xogadores Don Javier Bonilla Sevillano e Don Miguel Loureiro Ameijenda resultan compatibles coa descrición dos feitos que se contén no acta arbitral".
No caso de Bonilla, amoestado por "simular ser obxecto de infracción", a resolución establece que é imposible probar unha "hipotética desestabilización provocada por un adversario", tal e como defendía o club pontevedrés, polo que mantén o seu cartón amarelo e deberá cumprir un partido de sanción ao ser a décima da tempada.
Pola súa banda Miguel Loureiro, expulsado por unha acción de xogo que o colexiado viu como ocasión manifesta de gol, tamén foi castigado cun encontro de suspensión ao entender Competición que a valoración de "manifesta" corresponde unicamente ao árbitro do partido desde a súa "privilexiada" vista no propio terreo de xogo.
Tamén o Tudelano viuse afectado esta semana as sancións, no seu caso a do centrocampista Álvaro Corral, expulsado no partido ante o Celta B e que non poderá estar co seu equipo en Pasarón.
Relacionadas:
-
A fe e a ambición dá a remontada ao Pontevedra sobre o Tudelano, con gol de Bruno no desconto (2-1)
Por Ramiro Espiño & Diego Torrado |
-
A solidez do Tudelano a domicilio, seria ameaza para o Pontevedra
Por Diego Espiño |
-
O Pontevedra recorre a expulsión de Miguel Loureiro e a amoestación de Bonilla en Pamplona
Por Diego Espiño |
-
A temperá expulsión de Miguel lastra a un bo Pontevedra que merece máis ante Osasuna B (2-1)
Por Redacción |
-
Mario Barco, aliviado tras descartarse unha lesión muscular de importancia
Por Diego Espiño |