A medalla de bronce ao Mérito Deportivo, o "colofón perfecto" á carreira de Lourdes Domínguez
Rodeada de familiares e amigos e na súa cidade, Pontevedra. Así recibiu Lourdes Domínguez a medalla de bronce ao Mérito Deportivo, un dos maiores recoñecementos do deporte español, pola súa exitosa traxectoria de vinte anos na elite do tenis feminino.
A tenista pontevedresa, arroupada en todo momento polos seus pais e polos seus irmáns, sinalou que é un "honor" para ela ingresar nesta orde. Esta distinción, dixo, é o "colofón" á súa carreira deportiva.
"Siempre he llevado el nombre de España con orgullo", explicou Lourdes Domínguez. Ademais, agradeceu o apoio "incondicional" que recibiu durante dúas décadas de "dedicación constante al deporte, perseverancia, lucha e ilusión" tanto por parte do seu círculo máis próximo como dos seus compañeiros de club.
"Es un día maravilloso e inolvidable para mí", explicou tras recibir esta distinción de mans do presidente do Consello Superior de Deportes (CSD), José Ramón Lete Lasa.
No acto, que se celebrou nas instalacións do Centro Galego de Tecnificación Deportiva, tamén recibiu esta mesma medalla outro deportista pontevedrés.
Trátase de David Gómez, decatleta do Rosal, seis veces campión de España e olímpico en Atenas 2004 e Pequín 2008. Xa retirado desde hai catro anos, tivo un recordo especial para os seus adestradores, a quen lles debe chegar a ser olímpico, "algo que soñaba desde que era neno".
Lete Lasa, pola súa banda, destacou que coa incorporación destes dous deportistas "agrandamos a familia galega" nesta orde ao mérito deportivo, un "elegido" grupo de persoas que "sin duda" contribuíu a "cambiar el deporte en este país".
Ademais de familiares e amigos, ao acto acudiron o vicepresidente da Xunta, Alfonso Rueda; a subdelegada do Goberno en Pontevedra, Ana Ortiz; a secretaria xeral para o Deporte, Marta Míguez ou o alcalde de Pontevedra, Miguel Anxo Fernández Lores.
Relacionadas:
-
Lourdes Domínguez está de volta no circuíto profesional... como adestradora
Por Redacción |
-
Lourdes Domínguez, medalla de bronce ao Mérito Deportivo
Por Alejandro Espiño |
-
Lourdes Domínguez recibe o agarimo de todo o tenis galego
Por Redacción & Diego Torrado |
-
VÍDEO.- Lourdes Domínguez anuncia cunha emotiva rolda de prensa a súa retirada do tenis profesional
Por Diego Espiño & Mónica Patxot |