Derrota do Teucro en Meaño fronte ao FC Porto (25-27) e vitoria do Cisne en Tui sobre BM San Tirso (26-24)
Por Redacción
Dobre compromiso amigable luso-galaico para Teucro e Cisne, que seguen cos seus partidos de pretemporada, e de novo, como sucedese hai unha semana, sorte dispar para os dous equipos pontevedreses, que esta vez investiron papeis, sendo o equipo azul quen se atopou coa derrota, mentres os brancos lograban impoñerse ao seu rival.
Os de Quique Domínguez fóronse ata Meaño para verse as caras cun potente rival como o FC Porto. Dominaron durante a maior parte do partido, pero terminaron cedendo nos últimos 15 minutos por un axustado 25-27.
O Teucro xogou con acerto e unha excelente defensa na primeira metade, na que chegou a dispoñer dunha renda de cinco goles (8-3) aos 15 minutos, pero os portugueses entoáronse ata poñerse un abaixo (11-10, minuto 25), para irse ao descanso cun apertado 14-12 favorable ao equipo pontevedrés.
A segunda parte tivo parecido guión. O Teucro mandou ata o minuto 45, e mesmo recuperou unha cómoda vantaxe (17-13), pero faltoulle fol e un parcial de 2-6 entre os minutos 45 e 50, deron a volta ao marcador, poñendo ao FC Porto por diante (23-24).
Os portugueses manexáronse mellor nese apertado final para terminar impoñéndose por 25-27.
Pola súa banda o Cisne desprazouse a Tui para enfrontarse ao BM San Tirso, nun partido que os pontevedreses dominaron desde o principio, especialmente na primeira parte, que finalizou cun parcial de 15-10.
Como lle sucedeu ao Teucro, os cisneístas acusaron tamén a súa curta rodaxe, baixando lixeiramente o seu rendemento na segunda metade, o que aproveitou San Tirso para reducir a súa desvantaxe, pero sen poder impedir o triunfo final dos pontevedreses (26-24).
Relacionadas:
-
Saúl Campo, sobre a pretempada teucrista: "Buscamos sensaciones y creo que las estamos encontrando"
Por Diego Espiño |
-
O Teucro supera con claridade ao Novás e cítase co Cisne en semifinais da Copa Galicia
Por Redacción |
-
O Cisne avanza na Copa Galicia tras vencer ao Chapela (23-29)
Por Redacción |
-
Triunfo do Teucro ante o Avanca portugués nun partido de luces e sombras
Por Redacción |
-
Sorte dispar para Teucro e Cisne nos seus amigables de pretemporada
Por Redacción |
-
Teucro e Cisne xa coñecen o seu camiño na Copa Galicia de balonmán
Por Redacción |