Samieira, sede do Campionato Galego de Dúatlon Cross
Por Diego Espiño
Os arredores do campo de fútbol de Samieira serán escenario o próximo domingo día 17 do VII Dúatlon Cross Concello de Poio, que este ano será ademais o Campionato Galego da especialidade.
Un total de 95 deportistas competirán a partir das 11:00 horas nas categorías júnior, sénior e veteráns en dous circuítos que mesturarán pasos por sendeiros, pistas forestais e estrada.
Os competidores afrontarán un primeiro segmento de carreira a pé de 5,4 quilómetros en dúas voltas ao percorrido habilitado, dando paso a un tramo de 19,5 quilómetros en bicicleta "con bastante desnivel polas pistas forestais" para rematar de novo cunha volta de carreira a pé de 2,7 quilómetros.
A proba, organizada polo Club Monte Abaixo, variou partes do circuíto, como recoñece o seu presidente Alfonso Gondar, "ano tras ano intentanmos mellorar o percorrido introdocindo algunha variante".