A carreira PonteNoite 5+5 enche de atletas a vida nocturna de Pontevedra
Non hai hora que non sexa boa para correr. Iso demostraron os máis de 600 corredores que participaron este sábado na cuarta edición da carreira popular PonteNoite 5+5, que percorreu en horario nocturno as principais rúas da cidade de Pontevedra.
A proba, a cuarta que integra o Circuíto de Carreiras Populares de Pontevedra (CCCP), foi todo un espectáculo, tanto pola zona da cidade pola que discorreu como por un horario -as nove e media da noite- que a fai especial.
Os gañadores foron José Alberto Bastos en categoría masculina e Leticia Fernández na feminina.
Bastos cruzou a liña de meta tras empregar 32 minutos e 8 segundos en completar os dez quilómetros da proba. Avantaxou en 16 segundos a Amadeo Abal, segundo clasificado. Terceiro foi Abel Barros, que parou o seu reloxo en 33 minutos e 40 segundos.
Pola súa banda, Leticia Fernández segue dando mostra do seu gran momento de forma e impúxose con rotundidade entre as mulleres. Completou o percorrido en 37 minutos e 12 segundos. Foi 48 segundos máis rápida que Barca Toba, que ocupou a segunda posición. Ao podio tamén se subiu Lorena Salgueiro, terceira cun tempo de 38 minutos e 18 segundos.
Ademais dos dez quilómetros, os participantes podían optar por facer só cinco quilómetros. Nesta categoría, os gañadores foron Sergio Fonseca e Mónica López Fuentes.
A proba contou tamén cunha carreira solidaria, Run For Parkinson, duns 600 metros de distancia e cuxo diñeiro recadado a través das inscricións será doado á Asociación de Párkinson da provincia de Pontevedra.
Relacionadas:
-
Un trail urbano nocturno, novidade do Circuíto de Carreiras Populares 2017
Por Redacción |
-
Inscrición aberta para o XXI Medio Maratón Cidade de Pontevedra
Por Redacción |
-
O Medio Maratón de Pontevedra será Campionato Galego 24 anos despois
Por Redacción |
-
O Burgo, 20 anos de aposta polo deporte coa Carreira Pedestre Santiaguiño
Por Diego Espiño |
-
A inscrición para a Pontenoite, aberta ata o próximo mércores
Por Alejandro Espiño |
-
Pablo Dapena e Leticia Fernández reinan en Campañó
Por Diego Torrado |