Unha reacción que invita ao optimismo
Por Diego Espiño
A tranquilidade volveu ao Pontevedra Club de Fútbol tralos dous últimos resultados ligueiros, facendo esquecer un irregular comezo de competición que supuxo o peor arranque dos últimos anos.
Iso quedou atrás cos triunfos na casa ante o Coruxo, que chegaba a Pasarón como líder, e en especial o logrado en Santander ante un Real Racing obrigado a pelexar polo ascenso.
O equipo granate empezou a traducir en puntos as sensacións positivas que mostraba no terreo de xogo, algo que logrou ao deixar atrás a seca goleadora coa que comezara a liga.
Se en seis xornadas só lograron anotar dous tantos, ambos de Borjas ante o Tudelano, en dous partidos o Pontevedra conseguiu perforar a meta contraria en cinco ocasións, por dous goles en contra, e o que é máis importante sumou varios futbolistas á lista de goleadores.
A Borjas, que acumula catro goles dos sete do equipo, sumáronselle nesta faceta Jandrín, Pedro García e Verdú.
A mellora nos resultados coincide tamén cun momento no que Luisito pode contar con todo o seu plantel en perfectas condicións, o que non ocorrera ata o momento entre lesións e sancións.
Por outra banda o triunfo no Sardinero ten valor dobre por quitarse a etiqueta de mal visitante no mellor escenario posible, e é que os granates non gañaban fóra de casa desde o 26 de abril en Bouzas (1-2), na xornada 35 da pasada campaña.
Ingredientes todos eles que invitan ao optimismo ao superar ademais una das fases máis complicadas da competición, visitando de xeito consecutivo Ferrol e Santander. Agora o Pontevedra seberá confirmar o seu bo momento nos próximos compromisos, Atlético Astorga na casa (domingo, 17:00 horas) e ante o Arandina a domicilio.
IGUALDADE NA CLASIFICACIÓN
O Grupo I da Segunda B estase a caracterizar por unha tremenda igualdade. Co Racing de Ferrol como líder destacado e o Logroñés seguindo os seus pasos, o resto de equipos pelexan nunha pequena marxe de puntos.
Reflexo da igualdade existente é o feito de que o cuarto clasificado, o Lealtad asturiano, suma 13 puntos, só tres máis que o decimoquinto, Arandina. Visto doutro xeito, o Pontevedra con 10 puntos está a só tres da fase de ascenso pero tamén a tres do descenso directo, mentres a distancia coa promoción de permanencia é dun punto.
Relacionadas:
-
Sarxento Luisito
Por Ramiro Espiño |
-
Mouriño dá a vitoria a un Pontevedra que remonta ao Atlético Astorga (2-1) nunha boa segunda parte
Por Ramiro Espiño & Diego Torrado |
-
Un rival inédito para continuar a escalada en Pasarón
Por Ramiro Espiño |
-
Fe Seguros, novo patrocinador para a camiseta do Pontevedra
Por Diego Espiño |
-
Partidazo e vitoria de prestixio do Pontevedra (1-2) que só sofre ao final en Santander
Por Redacción |