O Setga Monte Porreiro empeza a liga con derrota
Por Redacción
Mal comezo de tempada para o equipo do Setga Monte Porreiro, que un ano máis compite na División de Honra feminina de tenis de mesa.
O conxunto pontevedrés comezou a liga con derrota na casa ante o Cidade de Narón (2-4), nun encontro disputado no pavillón da Cidade Infantil Príncipe Felipe.
Elísabet Cadilla foi a encargada de abrir lume, conseguindo o primeiro punto en xogo ante a visitante Helena Martín, pero o Cidade de Narón empató enseguida co triunfo de Laura Fernández sobre a pontevedresa Antía Torres.
O Monte Porreiro volveuse a adiantar co punto de Victoria Cadilla sobre Belén Sañudo, poñendo de face o encontro, pero as coruñesas conseguiron adxudicarse os tres puntos restantes asegurándose o triunfo.
Un comezo de liga negativo para o Setga Monte Porreiro, que pese a iso afronta a tempada con optimismo poñendo o obxectivo de lograr a permanencia sen pasar excesivos apuros.