O Voleibol Pontevedra solicita a organización da fase de ascenso á Primeira División Feminina
Por Redacción
Xa estaba matematicamente clasificado para a fase de ascenso a Primeira División, pero o equipo feminino do Club Voleibol Pontevedra non se relaxou pechando a fase regular da competición cun novo triunfo.
Fíxoo de xeito contundente cun 3-0 na casa ante o Teis cun tenteo de 25-16, 25-14 e 25-23.
Agora o conxunto pontevedrés, tras rematar segundo, afronta a preparación para a fase de ascenso, prevista para o próximo mes de maio (do 7 ao 10) nun lugar aínda por decidir.
O Club Voleibol Pontevedra confirmou a súa intención de organizar a devandita fase na cidade de Lérez.
No bando contrario situouse o bloque masculino, que descansou na última xornada da Segunda División rematando a competición na última posición da táboa.