O Villalonga, con nove xogadores, vende cara a súa derrota ante o Negreira
Por Redacción
Dura derrota a sufrida polo Villalonga en San Pedro. Dura non polo resultado ante o Negreira (1-2), senón pola forma de caer dos de Guillermo Fernández.
A polémica arbitral protagonizou o choque desde o inicio. Primeiro porque o colexiado sinalou un penalti por empuxón na área de Gonzalo Iglesias sobre Tenorio que aproveitou Marc para adiantar ao Villalonga, e segundo polas expulsións rigorosas de dous futbolistas locais por dobre amoestación, Roberto Piñeiro no minuto 43 e Saúl no 70.
Antes da primeira expulsión o Negreira conseguira a igualada á saída dun córner rematado por Gonzalo no que o conxunto sanxenxino reclamou falta sobre Roberto Pazos, pero o que máis irritou á bancada de San Pedro foi o segundo tanto visitante, ao cabo o da vitoria, ao entender que Diego Otero se atopaba en situación de fóra de xogo.
Difícil panorama para Guillermo Fernández cara á próxima xornada ligueira coas baixas seguras de Machu, Leo e Álvaro e a dos dous sancionados. O Villalonga, décimo cuarto clasificado, visitará o Salvador Otero da Illa para enfrontarse ao Céltiga, afundido na penúltima posición tras caer goleado na Malata ante o Rácing de Ferrol (5-0).
VILLALONGA FC: Roberto Pazos, Quini, Javi Nogueira (Isma, min.46), Marc, Roberto Feáns, Miguel, Tenorio, Melo (Gabi, min.83), Pedro (Pichi, min.73), Roberto Piñeiro, Saúl.
SD NEGREIRA: Sergio Ríos, Adrián Vázquez (Marcos, min.84), Gonzalo Iglesias, Toño, Munín, Diego Gesto, ÿscar Vidal (Gonzalo Suárez, min.65), Paco, Diego Otero, Dani Méndez, Adán (Hugo, min.74).
Árbitro: López Fernández, auxiliado nas bandas por Javier Mella e Álvaro Gil. Amonestou a Miguel, Marc e Pedro nos locais e a Sergio Ríos, Gonzalo Iglesias e Gonzalo Suárez nos visitantes. Expulsou por dobre cartón amarelo aos xogadores do Villalonga Roberto Piñeiro (min.43) e Saúl (min.70).
Incidencias: Partido disputado no Campo de San Pedro, Vilalonga.