A Filarmónica ofrece no Principal un concerto do pianista Eduardo Fernández
Por Redacción
O pianista Eduardo Fernández, un dos músicos máis destacados da súa xeración a nivel internacional será o próximo invitado da Sociedade Filarmónica de Pontevedra. Actuará no Teatro Principal o vindeiro luns 13 de novembro, a partir das 20.30 horas.
Ademais das súas numerosas actuacións en España, Eduardo Fernández é convidado regularmente a países como Rusia, China, México, Arxentina, Chile, Panamá, Ucraína, Austria, Italia, Francia, Suíza, Luxemburgo, Dinamarca, Estonia, Romanía, Noruega e India.
Obtivo un gran éxito en salas principais como Saint Petersburg Philharmonia, Xangai Oriental Art Center, Beijing National Centre for the Performing Arts, Mumbai National Centre, Kiev Philharmonia, Palau da Música de Barcelona, Teatro Real ou Auditorio Nacional de Madrid.
Fixo o seu debut con orquestra na Sala Principal do Teatro Real xunto á Orquestra Sinfónica de Madrid con motivo do centenario da morte de Isaac Albéniz e foi recoñecido durante a súa carreira con varios premios.
Gravou varios CDs para Warner, Centaur, Naxos e Orpheus entre as súas próximas gravacións inclúese un novo proxecto con todas as sonatas de Alexandre Scriabin.
En Pontevedra, Eduardo Fernández ofrecerá a Sonata Claro de Lúa de Beethoven, o segundo Caderno de Iberia de Albéniz e os 24 Preluios op. 11 de Scriabin.