Luis Tosar pasea por Montero Ríos recreando a Barcelona dos anos 20
Por Cristina Saiz & Anxo Lourido
Xente que cruza con chapeu e traxe, coches antigos, cámaras, luces e unha palabra: Acción! É a rodaxe da escena da chegada do personaxe de Luís Tosar, Anibal Uriarte, á comisaría de Policía de Barcelona. Pero a escena de 'La sombra de la ley', de Dani de la Torre ródase, entre outros sitios, en Pontevedra e a comisaría é o instituto Valle Inclán.
A produtora Enma Lustres de Vaca Films sinala que durante a semana pasada gravaron no interior do instituto, escenas que se poderán ver ao longo de 20 minutos neste segundo filme do director galego, tras 'El desconocido'. O paraninfo do centro converteuse nunha sala de reunións e diferentes aulas son espazos para os diferentes equipos desta produción: vestiario, maquillaxe, figuración...
E este luns e martes da última semana de agosto toca a quenda de gravar en exteriores, con planos de entrada e de saída de Luís Tosar da comisaria entre o balbordo da rúa e unha escena de cando recibe unha chamada na que lle alertan do atraco a un banco.
O instituto foi escollido como escenario de rodaxe despois de que o equipo de produción se documentara e vise outros edificios modernistas como a Facultade de Belas Artes, o Concello, a Deputación e a Delegación de Defensa. De entre todos, o que máis se axustaba ao que querían era o Valle Inclán onde nun dos seus patios interiores atópanse durante estes días seis cabalos, como os que empregaba a policía de principios do século XX.
Dani de la Torre indica que mañá gravarán en Lourizán e mostrábase moi satisfeito co trato que están a recibir na cidade. "É moi cómoda, moi tranquila. A xente non dá a lata e é moi agradecida. Galicia en xeral, menos Santiago polo turismo, é moi cómoda para rodar, nada que ver con Barcelona", apuntaba o director de 'La sombra de la ley'.
O equipo técnico está formado por 100 profesionais e entre os figurantes e o elenco actoral, encabezado por Luís Tosar e Michelle Jenner, súmanse preto de 3.000 persoas.
Este luns que amencía chuvioso obrigou a cambiar a ambientación dunha escena, segundo admite o propio director. "Queriamos facer unha toma con sol e despois tivemos que reformular todo e facelo con choiva. Pero a choiva é moi fermosa e case nos fixo un favor", sinala De la Torre.
Dani de la Torre: "Pontevedra é moi cómoda, moi tranquila. A xente non dá a tabarra e é moi agradecida"
O 12 de xullo comezaban este traballo que finalizará o 4 de setembro en Monforte, no Museo do Ferrocarril, onde rodarán un atraco a un tren para esta película que conta unha trama no medio de violentos enfrontamentos entre anarquistas e matóns coa actividade dos gangsters de fondo.
Durante este mediodía, a alcaldesa en funcións Carme da Silva e o vicepresidente da Deputación, César Mosquera, achegáronse para ver a gravación e saudar ao director, produtora e ao actor Luis Tosar. Deceas de persoas seguiron a filmación nos arredores da Alameda pontevedresa.
Relacionadas:
-
RADIO.- A playlist de... Daniel Gómez, recepcionista de noite, músico e intérprete de día
Por Marisa Ciordia & Cristina Saiz |
-
'A sombra da lei', rodada en Pontevedra, gran triunfadora dos Premios Mestre Mateo
Por Redacción |
-
'A sombra da lei' e 'Trote', sabor pontevedrés para as principais aspirantes aos premios Mestre Mateo
Por Redacción |
-
Pontevedra prepara a alfombra vermella para acoller a preestrea de 'La sombra de la ley'
Por Alejandro Espiño |
-
VÍDEO.- Primeiras imaxes de 'La sombra de la ley', película rodada o pasado verán en Pontevedra
Por Diego Espiño |
-
A película "Quien a hierro mata", protagonizada por Luis Tosar, rodarase en Cambados
Por Alejandro Espiño |
-
Pontevedra, de moda en cine e TV: "Fariña", "Vivir sin permiso" e "La sombra de la ley"
Por Alejandro Espiño |
-
Os narcos de 'Fariña' pasean por Pontevedra
Por Diego Espiño & Mónica Patxot |
-
A rodaxe da película 'La sombra de la ley' revoluciona o centro da cidade
Por Diego Espiño |
-
O instituto Valle Inclán, unha comisaría de cinema
Por Diego Espiño |
-
De "1921. La ley del plomo" a "La sombra de la ley": así é a película que Dani de la Torre rodará en Pontevedra
Por Alejandro Espiño |
-
Dani de la Torre rodará en Pontevedra "1921. La ley del plomo", a súa nova película tras "El desconocido"
Por Alejandro Espiño |