Un concerto didáctico para que alumnos de Primaria se acheguen a ritmos e melodías da música de baile do país. É o que ofrece a compañía Fetén Fetén no espectáculo A marabillosa historia do violín trompeta, ao que acudirán preto de dous mil escolares durante os dous próximos días. Os primeiros xa o fixeron este mércores 19 de abril.

Os nenos tiveron a oportunidade de coñecer estilos musicais que chegaron desde lugares afastados e que pasaron a ser banda sonora nacional, enriquecida coa influencia de numerosas e variadas culturas.

Diego Galaz e Jorge Arribas, os dous compoñentes de Fetén Fetén, mostráronlles instrumentos que van desde o acordeón, violín, frauta traveseira, mandolina ou gaita, ata un stroviol, un vibrandoneón, un cigar fiddle box ou mesmo unha cadeira de cámping, un serrucho, unha tixola e un violín trompeta.

A participación tamén estivo moi presente nesta actividade, facendo, por exemplo, que varios alumnos dirixisen ao resto, convertendo o auditorio nunha gran orquestra.

Fetén Fetén é un dos grupos de música en directo con máis proxección do panorama nacional. Recentemente participaron no Festival Internacional de Acordeón de Viena e o pasado 1 de abril editaron o seu terceiro disco, Cantables, un álbum que conta coa participación de artistas como Fito Cabrales, Julieta Venegas, Natalia Lafourcade ou Jorge Drexler entre outros.

Pantalla completa