300 músicos do Conservatorio Manuel Quiroga tocarán en beneficio da AECC
Por Redacción
O Conservatorio Profesional Manuel Quiroga celebrará o vindeiro mércores 22 de marzo o seu II Concerto Solidario, no que se darán cita máis de 300 músicos e cuxos beneficios irán destinados á Asociación Española contra o Cancro (AECC).
O concerto será ás 20.00 horas no auditorio Afundación de Pontevedra. Terá entrada libre e, ao finalizar, aquelas persoas que o desexen poderán realizar un donativo que irá destinado integramente aos programas e servizos e proxectos de investigación da AECC.
O evento contará coa actuación de dúas orquestras e dúas bandas baixo a dirección de persoal docente do Conservatorio Manuel Quiroga: Sergio Heredia, Iago Lariño, Francisco J. Moura e José Pérez.
A Orquestra de Corda dirixida por Sergio Heredia interpretará a Nova Vita de Antón Caneda e A Illa Do Santo, de Xacobe Medina. Dirixida por Francisco J. Moura, a Orquestra Sinfónica interpretará a Slavonic Dance nº 8 e a 9ª Sinfonía - Scherzo, de A. Dvorak.
Iago Lariño dirixirá a Banda I, que interpretará A Tameside Overture, de P Sparke, e Sinfonía nº1 (5º Mto) Hobbits, de J. de Meij. Jose Pérez será o director da Banda II, que interpretará Cape Horne (para trompa solista e banda), de O.M. Schwarz, e Notes en Rag, de A. Crepin. Ainara González será nesta banda a trompa solista.