Presentan o segundo volume de Galician Bizarre
Por Anxo Lourido
Este xoves 11 a partir das 10:30 da noite, a Sala Karma será o espazo de encontro do son bizarro en Galicia. No local vai presentarse o segundo volumen de Galician Bizarre, un disco recompilatorio que recolle 18 cancións inéditas compostas e interpretadas por outras tantas bandas galegas. Todas elas teñen en común compartir experiencias no mesmo lugar, na mesma época e cun estilo tendente ao bruterío musical.
Grupos como Lobishome (Montalvo), Los Televisores (Poio / Chantada), Los Thyssen (O Grove) ou os pontevedreses Tora! Tora! Tora! aportan un tema a este disco financiado a través do micropatrocinio, un sistema cada vez máis empregado para promover actividades culturais alternativas.
Na presentación haberá actuacións en directo da banda de Milladoiro, Sr Anido e de Tora! Tora! Tora, o grupo formado por Sergio Vidal, Alejandro Simón, Daniel Lovelle e Santiago Rodríguez.