Nova cita para a creatividade en galego dos mozos pontevedreses
Os mozos pontevedreses xa poden participar nunha nova edición do certame Ben Veñas, Maio, unha cita ineludíbel para os Institutos de Educación Secundaria (IES) e os Centros Integrados de Formación Profesional (CIFP) dos centros públicos na que o alumnado pode explotar o seu potencial creativo en galego. Ata o 15 de abril, os interesados poderán participar en calquera das súas cinco modalidades, entre as que se repartirán un total de 3.075 euros.
O coordinador deste ano, Manuel Lourenzo do IES Luís Seoane, xunto co concelleiro de Normalización Lingüística, Alberto Oubiña, presentou este martes no Concello o cartel e as bases desta nova edición do Ben Veñas, Maio. Trátase dunha iniciativa que busca "sacar a lingua fora das aulas", tal e como declarou Oubiña, e que "axuda a ver a lingua galega como unha lingua propia e apta para calquera tipo de expresión artística" manifestou Lourenzo.
As modalidades de banda deseñada e de narración curta chegan xa á súa XXIII edición. No primeiro caso, o tema será o uso e valoración das linguas e poderá utilizarse calquera tipo de técnica sempre en branco e negro; mentres que no segundo o tema será libre.
De tema libre tamén será o certame de poesía, que alcanza este ano a súa XV edición, do mesmo xeito que a de fotografía. Neste caso, para participar as imaxes deberán versar sobre algún uso curioso do galego en pancartas, valos publicitarios, etc.; e tamén se deberá xustificar a elección da imaxe acompañándoa cun comentario explicativo.
Os gañadores en calquera destas categorías recibirán un segundo premio de 75 euros e un primeiro de 150 euros, xunto cun lote de libros e un diploma en ambos os casos.
A tradicional Semana Teatral realizarase durante o 4, 5 e 6 de marzo. Durante estes días, representaranse as obras de teatro elaboradas durante todo o ano nos diferentes institutos participantes.
O certame musical terá o seu habitual encontro o 7 maio no Pazo da Cultura. Os grupos ou solistas interesados deberán interpretar dúas pezas musicais de calquera xénero. O único requisito é que todos os membros do grupo estean matriculados nalgún dos colexios pontevedreses. O premio nesta categoría constará dunha dotación económica de entre 150 e 400 euros. Haberá tamén un premio especial, no que se repartirán un máximo de 600 euros entre os membros do grupo.
Relacionadas:
-
Dez grupos musicais dos institutos da cidade participaron en Ben veñas Maio
Por Oskar Viéitez & Diego Torrado |
-
O certame de 'Ben veñas, maio' retorna para fomentar a lingua galega entre os mozos máis creativos
Por Redacción |
-
'Ben veñas, maio' emprende a súa anual busca de creatividade en galego nos institutos de Pontevedra
Por Alejandro Espiño |