A meditación sobre a arte e a natureza, base para 20 artistas no Encontro 'Fluíndo no Río Lérez'
Por Redacción
Vinte artistas serán invitados a traballar durante tres días nas marxes do río Lérez e na Illa das Esculturas con motivo da terceira edición do encontro creativo 'Fluíndo no Río Lérez' que se desenvolverá entre o 24 e o 26 de abril.
Carmen Hermo e Antón Sobral serán os coordinadores destas experiencias artísticas. Na mañá deste xoves 26 presentaron esta convocatoria acompañados pola concelleira de Cultura, Anxos Riveiro. Explicaron que nesta ocasión o encontro se centrará na meditación sobre a paisaxe co obxectivo de que se traballen os conceptos da contemplación e do silencio para que xurdan obras artísticas.
As actividades iniciaranse na Casa das Campás o venres 24 a partir das 20.00 horas coa conferencia a cargo de Espe Porto, representante da revista de arte contemporánea Latamuda que se centrará en arte, natureza e contemplación. Durante o sábado 25, os artistas realizarán os seus traballos en distintos puntos do río e na Illa das Esculturas. Ás 19.00 horas, os artistas poñerán en común as súas experiencias no Pazo da Cultura.
Aqueles artistas que queiran participar poden poñerse en contacto cos coordinadores a través do teléfono 629.818.199.