"Clanes", a serie que Netflix gravou en Cambados, estrearase o 21 de xuño
Por Alejandro Espiño
Xa hai data para poder ver o resultado de Clanes, a serie que Netflix gravou en Cambados. A plataforma estreará a súa primeira tempada o próximo 21 de xuño.
Así o anunciou a compañía, que publicou este luns o primeiro tráiler desta serie de ficción que, co narcotráfico como pano de fondo, rodou Vaca Films.
Aínda que a serie está ambientada en Cambados, a rodaxe de Clanes tamén levou a todo o equipo técnico a outras localidades próximas como Vilanova. Vilagarcía, A Illa ou Sanxenxo.
Clanes está protagonizada polos actores Clara Lago (Ocho apellidos vascos) e o galego Tamar Novas (El desorden que dejas).
Ela dará vida a Ana, unha avogada recentemente chegada a Cambados, con ampla experiencia nun dos mellores bufetes de Madrid, que decidiu empezar de cero en Galicia coa intención de saldar contas co seu pasado.
A súa presenza non pasará desapercibida para ninguén, especialmente para Daniel, o personaxe que encarnará Novas, o fillo dun importante narcotraficante e cabeza visible do clan dos Padín, cuxo liderado ostenta mentres o seu pai permanece en prisión.
Una historia de venganza convertida en amor imposible, inspirada en una ría real. #Clanes, con Clara Lago y Tamar Novas, llega el 21 de junio. pic.twitter.com/7qgialV5Gz
— Netflix España (@NetflixES) May 6, 2024
No elenco da serie tamén figuran, entre outros, Xosé Antonio Touriñán (Cuñados), Chechu Salgado (Las leyes de la frontera), Melania Cruz (Malencolía), Miguel de Lira (Cuñados), Francesc Garrido (Sé quién eres), Diego Anido (As Bestas) e María Pujalte (Los misterios de Laura)
Jorge Guerricaechevarría, que ten dous premios Goya polas películas Celda 211 e Las leyes de la frontera, é o creador e guionista desta nova ficción, que está dirixida por Roger Gual, que xa traballou con Netflix en Las chicas del cable y El desorden que dejas.
A primeira tempada de Clanes consta de sete episodios. Todos eles estarán dispoñibles en Netflix o mesmo día do adestro, como é habitual nos lanzamentos desta plataforma.